കോട്ടയം ∙ കേരള കോൺഗ്രസ് സംസ്ഥാന കോഓർഡിനേറ്ററായി പി.ജെ.ജോസഫിന്റെ മകൻ അപു ജോൺ ജോസഫിനെ തിരഞ്ഞെടുത്തു. ഇതോടെ പാർട്ടിയിൽ സംഘടനാ ഭാരവാഹികളിൽ അപു ആറാം സ്ഥാനത്തായി. കോട്ടയത്തുചേർന്ന പാർട്ടി ഉന്നതാധികാര സമിതി യോഗത്തിലാണു തീരുമാനം. പാർട്ടിയുടെ പ്രഫഷനൽ ആൻഡ് ഐടി വിങ്ങിന്റെ ചെയർമാനായിരുന്നു.
ഇതോടെ കേരള കോൺഗ്രസ് രാഷ്ട്രീയത്തിൽ ഒരു പിൻഗാമി കൂടി. ചീഫ് കോഓർഡിനേറ്ററായിരുന്ന ടി.യു.കുരുവിളയെ ഡപ്യൂട്ടി ചെയർമാനായി തിരഞ്ഞെടുത്തു. ജോണി നെല്ലൂർ രാജിവച്ചു പോയതോടെ ഡപ്യൂട്ടി ചെയർമാൻ സ്ഥാനം ഒഴിവുണ്ടായിരുന്നു. മുൻ മന്ത്രി കെ.എം.മാണിയുടെ മരുമകൻ എം.പി.ജോസഫിനെ വൈസ് ചെയർമാനായും തിരഞ്ഞെടുത്തു.
